Oscar García Patiño

Oscar García Patiño

Oscar García Patiño - UxC

Catorce anos pasaron xa desde que, impulsados pola ilusión dun grupo de veciños e veciñas, fundamos Unión por Cambre. Un partido político afastado das ataduras e dos compromisos que sofren os grupos tradicionais que entendiamos, non representaban, nin representan, actualmente, os intereses do noso concello. O profundo coñecemento da nosa contorna, da nosa historia e o apego á nosa xente foi o impulso que nos motivou e motiva neste proxecto onde a participación cidadá é a base para construír o concello que merecemos.

Un proxecto baseado nun urbanismo social, con núcleos ordenados, integradores e accesibles que promovan as relacións entre as persoas. Un proxecto que avanza cara a un concello enerxeticamente sostible. Un proxecto que promove máis dotacións públicas no rural, espazos culturais e deportivos. Un proxecto que estimulou eventos culturais recoñecidos a nivel nacional. Un proxecto solidario que non deixa atrás a ningunha persoa. En definitiva, un proxecto co que planificar o noso futuro, sempre pensando na xente.

Como veciño e alcalde, teño que expresar o meu orgullo e agradecemento polo comportamento de todos e todas ante a pandemia mundial e a crise económica na que esta derivou. Esta situación obrigounos a cambiar as nosas prioridades aparcando, temporalmente, a execución do noso proxecto para centrarnos no que para nós será sempre o prioritario: a seguridade e benestar das nosas veciñas e veciños.

Moitas veces teño dito que o importante non é o que se promete, senón o que se cumpre. Por iso, a pesar da satisfacción de ter cumprido coa maioría dos obxectivos para este mandato, quero aproveitar esta oportunidade para reflexionar e pedir desculpas polas promesas non cumpridas: o plan de saneamento para o rural ou non dispoñer das áreas de recreo no río Mero. Un atraso, non un incumprimento, porque en cada un deses obxectivos seguimos a traballar, avanzando para que se fagan realidade.

Quero reiterar o meu compromiso con todas as veciñas e veciños de Cambre, con honestidade e transparencia. Por iso, pídovos a vosa confianza para continuar xuntos este proxecto.

Óscar A. García Patiño
Alcalde de Cambre e candidato de UxC

Unión Por Cambre e o seu soño para Cambre

Fotografía y vídeo realizado por Awen Studio.