Cambre segue esperando resposta da Xunta sobre as senda da Xira
Dende que no pleno de marzo de 2017 se aprobase solicitar á Xunta a execución da obra do “Itinerario peonil e ciclista na AC-214 en Sigrás”, o concello de Cambre segue a esperar unha resposta oficial do ente autonómico sobre esta obra.
Foi o 25 de abril de 2017 cando o concello de Cambre entregou as actas de conformidade de cesión dos terreos necesarios á Xunta de Galicia.
Dende ese día, e despois de varios escritos reiterando esa solicitude – o último o 1 de abril deste ano- a resposta oficial da Xunta ao concello de Cambre segue sen producirse.
A única resposta que deu a Xunta, a través dos medios, foi en abril deste ano cando dixo que faltaban os terreos para poder executar á obra. Unha explicación que rexeitaba o alcalde de Cambre, Óscar García Patiño, que aseguraba que o concello cedeu á Xunta o 90% do terreo de forma gratuíta, quedando pendentes dúas parcelas que non quixeron facer a cesión. Neses dous casos, apunta o primeiro edil, é á Xunta a quen lle corresponde expropiar para poder executar a obra.
“A Xunta que nin sequera amosou nin a nós nin aos veciños o proxecto que di que modificou, escúdase agora en dúas parcelas que non cederon voluntariamente os veciños”, sostén o alcalde de Cambre que lamenta que o ente autonómico sí se dera tanta presa para expropiar os terreos da Vía Ártabra – máis de 200 parcelas e máis de 80 propietarios- mentres que para expropiar a dous propietarios para as beirarrúas levan máis de dous anos.
O alcalde de Cambre sinala que “é lamentable que a Xunta minta a veciñanza. Contratou un proxecto en 2014 que vendeu a bombo e platillo. Entón o anterior alcalde era da mesma cor, do Partido Popular. É moi triste que os intereses dun partido político se antepoñan á seguridade dos peóns que cruzan a diario a AC214 xogándose a vida”, conclúe o primeiro edil de Cambre que segue esperando unha resposta por escrito do goberno de Feijóo en relación a senda peonil da Xira que xa acumula máis de 4 anos de demora.