Óscar García Patiño explica que as vivendas da Patiña son de Protección Oficial ata 2027
No pleno extraordinario solicitado polo PP de Cambre para abordar o tema das vivendas da Patiña, o alcalde Óscar García Patiño desvelou que o edificio da Patiña é de Protección Oficial ata 2027 tal e como se recolle na documentación facilitada polo Banco Santander ao Concello.
García Patiño, que tivo acceso ao documento enviado polo Banco Santander sobre a situación do edificio, lamenta que dende a Xunta aínda non enviasen o expediente solicitado polo Concello o pasado 9 de outubro. “É curioso que o Banco Santander tarde tres días en enviarnos o documento e a Xunta aínda non enviou o expediente despois dun mes de espera”, sinala o primeiro edil.
Tal e como se pode ver na documentación remitida pola entidade bancaria, o acordo entre a promotora e o Instituto de Vivenda e Solo foi asinado en 1997 e ten unha vixencia de 30 anos, polo que non remata ata 2027. Esta información da un xiro radical á problemática da Patiña xa que queda demostrado que a propietaria do edificio ten a obriga de renovar o aluguer aos inquilinos nas mesmas condicións, sempre e cando se cumplan os requisitos que para alugueres de protección oficial marque a lei.
García Patiño esixe responsabilidades á Xunta de Galicia e ao Instituto de Vivenda pola nefasta xestión no tema das vivendas da Patiña. “Era tan doado como non ocultar que este bloque de vivendas é aínda de Protección Oficial. Non é de recibo que a Xunta saque un comunicado dicindo que acordaron co Banco Santander unha moratoria de tres anos cando en realidade os inquilinos teñen dereitos, como mínimo, ata 2027”, sinala o primeiro edil.
A Xunta asegurou nun comunicado hai uns días que “conseguiron renovar os contratos por tres anos a pesar de que as vivendas xa non son de protección oficial” despois de comunicar ao Concello e aos veciños afectados que o edificio xa non cumpría co réxime de Protección Oficial. Dende a Xunta venderon unha solución que non ten razón de ser ao estar aínda o edificio en réxime de Protección Oficial. Dende a Xunta tampouco informaron aos veciños afectados de que teñen dereito de tanteo sobre os seus alugueres.
Intervención do alcalde, Óscar García Patiño, no pleno extraordinario do 5 de novembro
