UxC destinou máis de 300.000 euros para mellorar edificios municipais

Melloras nos locais sociais de Lendoiro, Andeiro, Sigrás, Santa María de Vigo e na Casa do Pobo de Meixigo foron algunhas das actuacións levadas a cabo polo goberno que encabeza Óscar García Patiño (UxC).

A estas melloras hai que sumar a construción do local social de Cela, que se atopa xa rematado a disposición dos veciños e veciñas. Con esta actuación, o partido que lidera García Patiño cumpre unha das súas promesas e dáse solución a unha débeda histórica que o Concello tiña cos veciños e veciñas da parroquia de Cela, a única do municipio que, ata este ano, carecía de local social.

Se a participación veciñal é un dos eixos fundamentais da política de Unión por Cambre, poñer a disposición de veciños e veciñas locais en condicións onde reunirse, facer actividades e celebrar diversos actos é básico para seguir garantindo unha comunidade forte e unida que, sen dúbida, redundará no benestar de todo o concello.

Melloras nos edificios administrativos

A apertura do pavillón de Anceis, que a oposición tentou vetar desde o primeiro minuto, a posta á disposición dos veciños e veciñas da Biblioteca Central María Pita, a apertura da Omix en Casa Arrigada ou o novo local de Servizos Sociais son catro das actuacións máis importantes feitas nesta lexislatura en canto á creación de novas instalacións municipais.

Actuacións ás que hai que sumar as obras de mellora e ampliación que se están a levar a cabo no complexo deportivo da Barcala ou a apertura do rexistro municipal do Temple no edificio dos Magnolios, onde tamén se abriu a oficina de Atención á Cidadanía co obxectivo de mellorar os servizos e a atención que se prestan dende o Concello á cidadanía.